सहिद स्मारक ‘ए’ डिभिजन लिग फुटबल अन्तर्गत आज नेपाल पुलिस र मछिन्द्र खेल्दै
सहिद स्मारक ‘ए’ डिभिजन लिग फुटबल अन्तर्गत आज एक मात्र खेल हुने भएको छ । जारी लिगको सातौं चरण अन्तर्गतको खेलमा आज विभागीय टोली नेपाल पुलिस क्लब र साविक विजेता मछिन्द्र क्लबबीच प्रतिस्पर्धा हुनेछ । त्रिपुरेश्वरस्थित दशरथ रङ्गशालामा हुने आजको खेल दिउँसो ४ ः ४५ मा सुरु हुनेछ ।उपाधि दाबेदार मानिएको मछिन्द्रका लागि आजको खेल महत्त्वपूर्ण रहेको छ ।एएफसी कप छनोट खेल्नका लागि मछिन्द्रलाई पुलिसविरुद्ध जित्नैपर्ने दबाब छ ।मछिन्द्र ६ खेलमा १४ अङ्क जोडेर दोस्रो स्थानमा रहेको छ । पुलिससँग हार वा बराबरीमा रोकिएमा मनाङ एएफसी कपका लागि छनोट हुनेछ ।यता, पुलिस ६ खेलमा ६ अङ्क जोडेर दशौँ स्थानमा रहेको छ । पुलिस आज मछिन्द्रलाई हराएर अङ्क तालिका सुधार गर्न चाहन्छ ।
१८ पुष २०७८, आईतवार ०४:१० मा प्रकाशित