राष्ट्रिय दलको मान्यता नपाएका साना दलहरूले पनि आफ्नै चुनाव चिह्न पाउने
आगामी स्थानीय तह निर्वाचनका लागि राष्ट्रिय दलको मान्यता नपाएका साना दलहरूले पनि आफ्नै चुनाव चिह्न पाउने भएका छन् । निर्वाचन आयोगको हिजो बसेको बैठकले राष्ट्रिय दलको मान्यता नपाएका दलहरूलाई सशर्त दलीय चुनाव चिह्न दिने निर्णय गरेको हो । स्थानीय तह निर्वाचन ऐनको दफा २६ मा राष्ट्रिय मान्यता प्राप्त दललाई मात्र दलीय चुनाव चिह्न दिने व्यवस्था छ । तर साना दलहरुले आफ्नै चुनाव चिह्न पाउनुपर्ने माग गरेपछि आयोगले सशर्त दलीय चुनाव चिह्न दिने प्रस्ताव अघि सारेको आयोगका प्रवक्ता शालिग्राम शर्मा पौडेलले सीआईएनसँग बताउनुभयो । तर, आयोगले मागेको विवरणहरू नबुझाउने दलका उम्मेदवारलाई भने स्वतन्त्र उम्मेदवारलाई प्रदान गरिने चुनाव चिह्न नै प्रदान गरिने आयोगले जनाएको छ ।
३ चैत्र २०७८, बिहीबार ०५:५१ मा प्रकाशित