सरकारबाट नियुक्ती पाइसकेकाहरुलाई काँग्रेसबाट उम्मेदवार नबनाउन माग

काठमाडौं, २६  असोज।

आगामी प्रतिनिधिसभा र प्रदेशसभा निर्वाचनका लागि सरकारका विभिन्न निकायमा राजनीतिक नियुक्ती लिइसकेका आकाक्षीहरुलाई टिकट नदिन नेपाली कांग्रेस युवा नेताहरुले माग गरेका छन् ।

पार्टीकै सिफारिसमा सरकारको महत्वपूर्ण निकायमा नियुक्ती लिएर हाल टिकटका लागि दौडधुप गरिरहेका व्यक्तिहरुलाई टिकट वितरण गरिए भण्डाफोर गर्ने केही युवा नेताहले चेतावनी दिएका छन् ।

पार्टी भित्रका केही अवसरवादीहरु, शीर्ष नेताहरुसँग निकट भएकाहरु र पद लोलुप्तामा लिप्त ब्यक्तिहरुका कारण नयाँ पुस्ताले अवसर नपाएको भन्दै युवा नेताहरुले पार्टी नेतृत्वलाई सचेत गराएका हुन् ।

कांग्रेसका युवा नेता लाओस राईले राज्यका विभिन्न निकायको महत्वपूर्ण जिम्मेवारी सम्हालिसकेका व्यक्तिहरुलाई चाकडीका भरमा टिकट वितरण गरिए आफूहरुले सहेर नबस्ने चेतावनी दिए ।

‘पार्टीभित्र दुःख गरेका र सक्षम नयाँ पुस्तालाई वेवास्ता गरिए त्यो दासता र अन्याय बाहेक केही होइन, यसप्रति पार्टी नेतृत्व सचेत रहनुपर्छ,’ नेता राईले भने ।

टिकट वितरणका बारेमा सचेत गराउन काँग्रेसका केही नेताहरुले चाँडै बृहत भेला राखेर दबाब सिर्जना गर्ने बताएका छन् ।

उम्मेदवार निश्चित मापदण्ड बनाएर नयाँ पुस्तालाई अघि सार्न माग गर्दै ती नेताहरुले पार्टी नेतृत्वलाई सुझाव दिने बताए ।

पार्टीकै सिफारिसमा सरकारको महत्वपूर्ण पदको जिम्मेवारी सम्हाल्ने अवसर पाएका दर्जनौं ब्यक्तिहरु यतिबेला चुनावी दौडमा देखिएका छन् । कतिपय जिल्लाबाट उनीहरुको नाम सिफारिस भइसकेको छ ।

त्यस्तै पार्टीमा पटक पटक अवसर पाएका, विभिन्न निर्बाचनमा पटक–पटक पराजित भएका साथै संगठनप्रति अन्तरर्घात गरेकाहरुलाई पनि उम्मेदवार नबनाउन उनीहरुको माग छ ।

आगामी निर्बाचनका लागि यतिबेला राष्ट्रिय पुनर्निर्माण प्राधिकरणका प्रमुख कार्यकारी अधिकृत डा. गोविन्द पोखरेल प्युठानबाट प्रतिनिधिसभाको निर्वाचनमा उम्मेदवार सिफारिस भएका छन् ।

त्यस्तै भारतका लागि नेपाली राजदुत दीपकुमार उपाध्यय पनि कपिलबस्तुबाट चुनाव लड्ने तयारीमा छन् ।

सरकारको न्यूनतम पारिश्रमिक निर्धारण समितिको अध्यक्ष भइसकेका पत्रकार पोषण केसी बाँकेबाट सिफारिस भएका छन् । राष्ट्रिय योजना आयोगका केही सदस्यहरुको नाम पनि सिफारिस भएको छ ।

कांग्रेसले आगामी मंसिरमा हुने निर्वाचनका लागि उम्मेदवार छान्न १७ सदस्यीय केन्द्रीय संसदीय समिति हालै मात्र गठन गरेको छ ।

पार्टी सभापति शेरबहादुर देउवाले बुधबार संसदीय समिति गठन गरेका हुन् ।

कांग्रेसको विधानअनुसार संसदीय समितिले निर्वाचनमा उम्मेदवार छान्ने तथा सरकारमा जाँदा मन्त्रीहरुको नाम टुंगो लगाउने काम गर्नेछ ।

पलपलमा अपडेट थाहा पाउन तल लाईक गर्नुहोला

यसमा तपाइको प्रतिक्रिया लेख्नुहोला