सिद्धकुमाखको सार्वजनिक सुनुवाइ: विकास निर्माणमै केन्द्रित सरोकार

सिद्धकुमाख गाउँपालिका सल्यानले आर्थिक वर्ष २०८१/८२ को सार्वजनिक सुनुवाइ  सम्पन्न गरेको छ । गाउँपालिकाको आयोजना र  प्रकृति मल्टि प्रपोज मिडिया प्रालिको सहजीकरणमा वडा नम्बर ४ काे खार्बन र वडा नम्बर १ काे बाँझकाँडामा सार्वजनिक सुनुवाइ कार्यक्रम सम्पन्न भएको हो। सार्वजनिक सुनुवाइमा  गाउँपालिकामा वर्षभरि सञ्चालन तथा सम्पन्न भएका योजना तथा कार्यक्रम र आय व्ययको बारेमा जानकारी गराउनुका साथै नागरिकका प्रश्न , गुनासा र सम्बोधनलाई समेटिएकाे थियो ।

पालिकाले आव २०८१/८२ मा ३४ करोड ५४  लाख १४ हजार  अनुमानित बजेट ल्याएको थियो । यसमा कुल बजेटको ५३  प्रतिशत खर्च भएको छ । चालुतर्फ ६०.४% प्रतिशत खर्च गरेको पालिकाले पुँजीगततर्फ ३४.२ प्रतिशत खर्च भएको वार्षिक सार्वजनिक सुनुवाइ प्रतिवेदनमा उल्लेख गरिएको छ । यस्तै पालिकाले आव २०८१/८२ मा २० लाख ६८ हजार ३१ रुपियाँ राजस्व सङ्कलन गरेको  प्रमुख प्रशासकीय अधिकृत डिल्ली खडकाले जानकारी दिनुभयो । उहाँका अनुसार २९ लाख ३० हजार अनुमान गरिएकोमा अहिलेसम्म ३० लाख आन्तरिक आम्दानीको रकम जम्मा भएको हो । पालिकाको वार्षिक प्रतिवेदन प्रस्तुत गरेपछि प्रतिवेदनका आधारमा एवं सेवाको विषयमा सवाल जवाफ भएको थियो ।

कार्यक्रममा सहभागी नागरिकले शिक्षा , स्वास्थ्य, विद्युत, खानेपानी र भौतिक बिकास निर्माणका बारेमा चासोका साथ प्रश्न र जिज्ञासा राखेका थिए ।
सार्वजनिक सुनुवाइ कार्यक्रममा सिद्ध कुमाख गाउँपालिकाका अध्यक्ष भरत गिरी, उपाध्यक्ष रामबहादुर बस्नेत, प्रमुख प्रशासकीय अधिकृत डील्ली खड्का र वडा नम्बर ४ का वडा अध्यक्ष खर्कवीर रोका, वडा नम्बर  १ का वडा अध्यक्ष रमेश चलाउनेले उठेका प्रश्न र जिज्ञासाको उत्तर दिने प्रयास गर्नुभएको थियो ।

कार्यक्रममा गाउँपालिका अध्यक्ष गिरीले नागरिकको माग र चाहाना अनुसार काम गरेको बताउदै आगामी दिनमा पनि त्यसै अनुसार काम गर्ने बताउनु भयो ।
गाउँपालिकाले विकास निर्माणका योजनामा नागरिकको सहभागिता र पारदर्शिता सुनिश्चित गर्दै आएको र  स्थानीय आवश्यकता अनुसार प्राथमिकता तोकी काम अघि बढाइँने बताउनु भयो ।
उपाध्यक्ष राम बहादुर बस्नेतले विकासको मूल आधार सडक, खानेपानी, स्वास्थ्य र शिक्षा भएको र  यी क्षेत्रमा अझ प्रभावकारी योजना लागू गर्न गाउँपालिका प्रतिबद्ध रहेको बताउनु भयो । नागरिकका सुझाव र गुनासो आत्मासाथ गर्दै आगामी योजना प्राथमिकताको आधारमा निर्माण गरिने बताउनु भयो ।
यस्तै सहभागी वडा अध्यक्षहरुले विकास निर्माण योजनामा जनसहभागिता, गुणस्तर, समयमै काम सम्पन्न गर्ने विषयमा जोड दिएका थिए।