जिल्ला कारागार सल्यानका कैदीबन्दीका लागि योग शिविर संचालन

जिल्ला कारागार सल्यानमा रहेका कैदीबन्दीहरूका लागि योग शिविर सञ्चालन गरिएको छ। जिल्ला प्रहरी कार्यालय सल्यानले समुदाय–प्रहरी साझेदारी कार्यक्रमअन्तर्गत कैदीबन्दीहरूको शारीरिक र मानसिक स्वास्थ्य सुदृढ बनाउन योग शिविर आयोजना गरेको हो ।
मङ्गलबार बिहान प्रहरी प्रमुख डाक्टर हेम केसीले योग प्रशिक्षण दिएर योग शिविरको सुरुवात गर्नुभएको हो ।
योग शिविरमा कैदीबन्दीहरूलाई तनाव व्यवस्थापन, सकारात्मक सोच विकास, र मानसिक शान्तिका लागि योग शिविर संचालन गरिएको उहाँले बताउनु भयो । उहाँका अनुसार शिविरमार्फत कारागारमा रहेका कैदीहरूलाई आत्मसुधार र पुनस्र्थापनाको मार्गमा अग्रसर गराउने प्रयास गरिएको हो ।
प्रहरी प्रमुख डिएसपी डा. केसीले कारागारमा रहेका कैदीवन्दीको शारीरिक मात्रै होइन, मानसिक स्वास्थ्य सुधार गर्ने उद्देश्यले योग सञ्चालन गरेको बताउनुभयो । यसले कैदीबन्दीलाई सकारात्मक बाटोमा लैजान प्रहरीले रचनात्मक कार्यक्रम सञ्चालन गरिरहेको छ । योग शिविरमा जिल्ला प्रहरी कार्यालय सल्यानका प्रहरी निरीक्षक तथा सूचना अधिकारी बाबुराम बस्नेतले प्रशिक्षण गराइरहनु भएको छ ।
जिल्ला कारागारमा हाल १२६ जना कैदीबन्दी रहेका छन्, जसमध्ये ११२ पुरुष, १३ महिला र १ जना नाबालिका छन्। उनीहरूमध्ये धेरैजसो लागुऔषध दुव्र्यसन, जवरजस्ती करणी (जजक), मानव बेचबिखन, बहुविवाह, कर्तव्य ज्यान, र ज्यान मार्ने उद्योग जस्ता अभियोगमा सजाय काटिरहेका छन्। तीमध्ये सबैभन्दा बढी जवरजस्ती करणी मुद्दाका कैदी रहेको कारागार प्रशासनले जनाएको छ।
शिविरमा सहभागी कैदीबन्दीहरूले पनि यस्तो कार्यक्रमले आफूहरूलाई मानसिक शान्ति र आत्मनिरीक्षणमा सहयोग पुगेको प्रतिक्रिया दिएका छन्।