सल्यानमा निर्वाचनमा खटिने मतदान अधिकृत तथा सहायक मतदान अधिकृतलाई तालिम

सल्यानमा यही फागुन २१ गते हुन लागेको प्रतिनिधि सभा सदस्य अनिर्वाचनमा खटिने मतदान अधिकृतहरुलाई मंगलबादेखि तालिम दिन सुरु गरिएको छ । निर्वाचनलाई स्वच्छ, निष्पक्ष, मर्यादित र भयरहित वातावरणमा सम्पन्न गर्ने उद्देश्यले दुई चरणमा तालिम सञ्चालन गरिएको जिल्ला निर्वाचनका कार्यालय सल्यानले जनाएको छ । कार्यालयका प्रमुख धिरेन्द्र भण्डारीका अनुसार जिल्लाभर खटिने ४ सय ३० जना मतदान अधिकृत र सहायक मतदान अधिकृतका लागि तालिमको आयोजना गरिएको हो । पहिलो दिन २ सय २० जनालाई तालिम प्रदान गरिएको छ भने दोस्रो दिन २ सय १० जनालाई तालिम दिइनेछ ।

तालिममा निर्वाचनसम्बन्धी कानुनी प्रावधान, मतदान प्रक्रियाको व्यवहारिक अभ्यास, मतपत्र व्यवस्थापन, मतगणना प्रक्रिया, आचारसंहिता पालना तथा आकस्मिक अवस्थाको व्यवस्थापनबारे अभिमुखीकरण गराइएको छ । सल्यान जिल्लामा १ सय १७ मतदान स्थल कायम गरिएको छ भने २ सय ५ मतदान केन्द्र तोकिएका छन् । ती मतदान केन्द्रमा खटिने गरी ४ सय ३० जना मतदान अधिकृत तथा सहायक मतदान अधिकृत नियुक्त गरिएको छ । साथै जगेडामा रहेका कर्मचारीहरुलाई पनि आवश्यक अभिमुखीकरण प्रदान गरिएको कार्यालयले जनाएको छ । अभिमुखीकरण कार्यक्रमको उद्घाटन कार्यक्रममा बोल्दै मुख्य निर्वाचन अधिकृत प्रल्हादकुमार योगीले निर्वाचनमा खटिने कर्मचारीहरूले पूर्ण रूपमा निष्पक्ष भई कुनै पनि राजनीतिक पक्षधरता बिना जिम्मेवारी निर्वाह गर्नुपर्नेमा जोड दिनुभयो ।

उहाँले स्वच्छ र विश्वसनीय निर्वाचन गराउनु मतदान अधिकृत तथा सहायक मतदान अधिकृतको प्रमुख दायित्व भएको उल्लेख गर्दै आचारसंहिता कडाइका साथ पालना गर्न निर्देशन दिनुभयो । त्यसैगरी प्रमुख जिल्ला अधिकारी महेन्द्रकुमार सापकोटाले सफलतापूर्वक निर्वाचन सम्पन्न गराउन मतदान अधिकृत तथा सहायक मतदान अधिकृतको भूमिका अत्यन्त महत्वपूर्ण रहने बताउनुभयो। उहाँले निर्वाचन प्रक्रियालाई पारदर्शी र विश्वसनीय बनाउन सबै निकायबीच समन्वय र सहकार्य आवश्यक रहेको धारणा राख्नुभयो । तालिम सम्पन्न भएपछि सम्बन्धित कर्मचारीहरू आ–आफ्नो तोकिएको मतदान केन्द्रमा खटिनेछन् । निर्वाचनलाई व्यवस्थित, शान्तिपूर्ण र विश्वसनीय बनाउन सम्पूर्ण तयारी तीव्र पारिएको जिल्ला निर्वाचन कार्यालयले जनाएको छ ।